நீரற்ற ஆழ்கிணறு

நீரற்ற ஆழ்கிணற்றின்

சிதிலமடைந்த கருங்கல் சுவர்

கரும்பச்சை பாசியினால் வண்ணம்பூசப்பட்டு

தன் நிறமிழந்திருந்தது

எங்கோ வேர் செலுத்தி

முளைத்திருந்த ஒற்றைச் செடி

நீண்டு வளர்ந்து புறச்சூரியனைக் காண

ஒற்றை மொக்குடன்

இயற்கையுடன் பெருங்காதல் கொண்ட

உனக்காகக் காத்திருந்தது

இன்றிரவு பெய்யக்கூடிய பெருமழையில்

மேலுயரும் நீர் மட்டத்தில்

அச்செடியும் மொக்கும் மூழ்கி

அழுகிப் போகலாம்

புறம் காணும் பேராவலும்

பெருமுயற்சியும் கொண்ட அச்செடி

மீண்டும் வளர்ந்து

புதிதாயொரு பூவை

உனக்குப் பரிசளிக்கலாம்...!