Monday, 22 September 2014

தற்காலிக வெற்றி
















அவனுக்கு
வாக்குச் சாதுர்யம் அதிகம்

கடலலையாய் கூட்டமிருப்பினும்
கர்ஜிக்குமிவன் குரல் கேட்டு
அடங்கிப் போகும்
கருத்துக்களை ஆணித்தரமாய் பதிவதில்
அவனுக்கு நிகர் அவனே

எடுத்துக்காட்டுகளும்
எதுகை மோனைகளும்
சொற்பொழிவில் பவனி கொள்ளும்
அடலேறு போல் காட்சி தந்து
அத்தனை பேரையும்
ஆட்கொள்ளுவான்

பள்ளியில் தன்பிள்ளை அடங்காது
அவன்பேர் சொல்லி திரிகையிலும்
தவறு தங்கள் பக்கம் இல்லையென்று
தர்கித்த நேரத்தில் வேண்டுமானால்
ஆசிரியரையவன்
வென்றிருக்கலாம்

தறுதலையாய் மாறும் பிள்ளையை
தட்டிக் கேட்பதை தடுத்தது
தற்காலிக வெற்றியெனவும்
வாழ்வின் நிரந்தர தோல்வியெனவும்
பிற்காலத்தில் உணருகையில்
காலம் வெகுதூரம் சென்றிருக்கும்..!

No comments:

Post a Comment