Saturday, 17 October 2015

முனகல்


















முகவரியற்ற முனகலொன்று
மூச்சுக்குழல்கள் வழி வெளிவந்தது

பதப்படுத்தப்பட்ட மனமாயிருந்தும்
அடர்ந்த அழுத்தத்தின்
பாரம் தாங்காது புறம் வந்தது

அழுக்காறுகளும் கண்ணேறுகளும்
பின்னோக்கு சிந்தனைகளும்
சூழ்ந்த சிதைவுப் படிகங்களின் அனலுடன்
அடர்த்தி கூடிய காற்றுமிருக்க
புறம் சாடுவதொன்றே வழியாயிருந்தது

பனிமக் குழம்புகளின் தழுவல்கள்
சிலவற்றில்
ஏக்கப் புதையல்களின் வெளிப்பாடாகவும் இருந்தது

அனர்த்த அவலங்களின் சூழல்களும்
ஒதுக்கவியலாத புழுக்கங்களும்
கலந்தே உழலவேண்டுமென்பது
உலக நியதியாதலால்

புதைந்த எரிமலைக்குள்
வழியாத அழுத்தங்களில்
சிறிதளவு சுமந்த சீற்றத்தின் புறஞ்சாடல்
புதிதாகத் தோன்றவேயில்லை

வெளிப்பட்ட பேரழுத்தப் பெருமூச்சொன்றில்
அத்தனை அவஸ்தைகளையும்
கரைத்திடல் எளிதாவெனும்
கேள்விக்குறி மட்டும் இறுதியில்
தொக்கி நின்றது

No comments:

Post a Comment