இனி என்ன நடக்கும்

இருளடர்ந்த கொடும்பாதையில்
கைத்தடியுமற்ற அந்தனின் தளர்ந்த நடையுணர்ந்து
ஒளியூட்ட வந்தவொரு விளக்கு
எல்லைவரை உடனிருந்து
எத்தவைக்குமென இருமாந்திருந்தான்

விழியற்றவனின் இறுமாப்பு
வீதியோர சாக்கடையில்
வீழ்த்தப்படுமென உணராது

உரிமையுடன் விளக்கை
உற்று உற்றுப் பார்த்து நடந்தான்

பஞ்சடைந்த விழிகளில்
படர்ந்த வெளிச்சம் சிறிதெனினும்
அரவங்களை தவிர்ப்பதற்கு
அது போதுமாயிருந்தது

வரப்போகும் அதிகாலை வெளிச்சம்
போதுமெனச் சொல்லி
விடியலுக்கு முன்பான கருக்கலின் மையிருட்டில்
கை நழுவிப் போனதந்த திருவிளக்கு

தவிப்புடன் கைதுழாவியவனின் கண்களில்
தூரேயொரு வெளிச்சம் தெரிகிறது

அதற்கப்பால் புகைவண்டியின் சப்தமும் கேட்கிறது

எனினும் கிட்டிய வெளிச்சத்தை பற்றிக் கொள்ள
நடந்துகொண்டிருக்கிறான்

இனி என்ன நடக்கும்?